Allahnıñ ar-Rahman ve ar-Rahim olğan adınen!

Qırım musulmanları dini idaresi Diyanetnen beraberlikte Milli Meclis desteginen bu sene Turkiyege halqara imam hatip litseyge 8-9 sınıflarını bitirgen qırımtatar ballarnı Turkiye cumhuriyetine tasil almaq içün yolladı.

Evelden haber etkenimiz kibi 56 bala Qırımdan ve Ukraina qıtadan resmi sitede qayd etildi, 19-20.06.2018 tarihlerde IQ testi ve mulâkat Novoalekseyevka  qasabası 1 orta mektebinde Diyanet tarafından kelgen eyyeti 46 balağa keçirdi, ve neticede sade 8 balanı qabul ettiler. Ne yazıq ki Qırım işğal sebebinden, bazı bürokratik icraatlar içün oqul vizelerni alması qolay olmadı. Biz meseleni Milli Meclisle beraberlikte çozmege tırıştıq, amma teesüfki tek 4 ösmürge vizelerni almaq ve tamamen icraatlarnı bitirip Türkiyegedeki İstambul ve Bursa halqara imam hatip litseylerge yerleştirmege (Allaha biñ hamd olsun) muvaffaq olduq.

Allah milletimizge yeni, ilim sayibi nesillerni yetiştirmege, Vatanımıznı azat etmege ve öz tuvğan topraqlarımızda milli qırımlılarnıñ mekteplerni açmağa nasip eylesin!

Mucadelemiz devam ete…

QMDİ matbuat hızmeti