uk

QIRIM MUSULMANLARI DİNİY İDARESİ ÜLEMA ŞURANIÑ QARARI   № 9  20.04.2020 s.

ALLAHNIÑ AR-RAHMAN VE AR-RAHİM OLĞAN ADINEN!

QIRIM MUSULMANLARI DİNİY İDARESİ ÜLEMA ŞURANIÑ QARARI   № 9  20.04.2020 s.

Bütün hamd ve maqtavlar – Alemlerniñ Rabbi olğan Allahqa ait! Peyğamber azretleri Muhammedke, onıñ ailesine ve cümle sahabisine – selât ve selâmlar olsun!

Qırım musulmanlarnıñ Diniy İdareniniñ yanındaki Ülema Şuranıñ 9-cı toplaşuvı keçti. Toplaşuvda aşağıdaki qararlar alındı:

1. Aprel 23-te yañı Ramazan ayını çıqışını izlemek ve nezaretniñ neticelerine esaslanaraq 23 aprel aqşamı Ramazan aynıñ ilk kününi bellitirmek.

Hilâl Közetüv Komitetniñ (HKK) esabatına köre, 24 martta komitet Şaaban aynıñ hilâli çıqmadı, aynı zamanda Dünya Hilâl Közetüv Komitetniñ başqa azaları tarafından da yañı ay tesbit etilmedi. Böylece, 25 mart 2020 s. Recep aynıñ 30 künü olacağı ve hicretke köre 1441-de  Şaaban aynıñ 1 kününe 26 mart 2020 s. uyğun olacağı qayd etildi. Buña esaslanaraq, Şaaban aynıñ 29-ci künü 23 aprel 2020 uyğundır, o kün velâketli (vazifeli) Komitet Ramazan yañı aynıñ çıqacağını nezaret (köz) etecek.

2. 2020-ci senesi içün Nisab ölçüsini 8021 grivnâ miqdarında tasdıqlamaq.

Ülema Şurası nisabnı  (bir kişiden mıtlaq zakât ödemek (tölemek) içün kerekli olğan minimum servet ya da mülk) 2020-ci senege tasdıqladı.  Hanafi, Şafiy, Malikiy, Hanbaliy bütün İslam uquq mezheplerine köre, zakât (vacip  sadaqa) eger mülkniñ 85 gr. altın ya da 595 gr. kümüş qadar olduqça, er angi bir paranen (valütanen) sadaqa ödemelidir. Buña köre, Nisab 2020 –ci senede 8021 grn. olmalıdır. Bu qarar, Nisabnıñ kümüşiniñ 595 gr., altın ise 85 gr. aqça ya da bankadaki altın külçe şeklinde, 1 gr. kümüş – 13, 48 grn. (17.04.2020 s.)  13,48 grn. Х 595 gr. = 8021 grn.;  bugünki altın fiyatı 1 gr. – 1504, 54 grn. (17.04.2020 s.)  1504,54 grn. Х 85 gr. = 127886 grn..   Nisab altın ve kümüş  qıymeti arasında farq olsa, zakât fuqare ve muhtac insanlarnıñ aqqı olğannı köz ögüne almalımız. Allah qorqusı ve işançlılıq printsiplerine esaslansaq, aqça miqdarı minimum talap olğan seviyege yetkeninen Zakât ödenmek kerek. Bizim vaziyetimizde,  595 gr. kümüş, yani 8021 grn. olur.

3. 2020 –ci senege fitr sadaqanıñ bir insan başına 100 grn. miqdarında tasdıqlamaq.

2020-ci yıl içün fitr-sadaqanıñ ekvivalenti (qarşılığı) 2,675 kg. (1 saa) orta fiyatına köre adam başına 100 grn. miqdarında tasdıq etildi. Hanafi mezhebine ve bazı sahabilerniñ ve tebiunlerniñ amellerine köre fitr-sadaqanı em yemek (ğıda), em de paranen berilmesi teklif etildi.

4. KORONOVİRUS VE DİGER YUQUNÇLI HASTALIQLARDAN ÖLGEN MUSULMANLAR İÇÜN DEFİN ETMEK TERTİBİ.

Ülema Şurası koronovirus ve başqa yuqunçlı hastalıqlardan ölgen musulmanların kömülmesi içün bir tertip qabul etti.

– Koronovirus ve diger yuqunçlı hastalıqlardan ölgen bir musulman yuvulmalı, kefinlikke sarılmalı, onıñ cenaze namazı oqulmalı ve başqa yuqunçlı olmağan  hastalıqtan ölgen musulman kibi kömülmelidir. Bu vaziyette bütün tehlükesizlik tedbirlerine riayet etmek kerektir. Hususan merhumnı ferdiy qoruyıcı vasitalarda: qoruyıcı urbalarda, rezin qolçaqlarda, maskada ve ilâhre.

– Ölü adamnı yuvğan bir insanın virus ya da infektsiyanıñ keçebilecegine dair bir qorqusı olsa Hanafi mezhebine köre ( “Mariki al-Falâh” 463 saif. baq)    bir insannıñ bedenine toqunmazdan suvnen yuvulmasına ruhset etile. Eger bunı yapmaq imkân olmasa, suvnen yuvmaqnı qaldırıp teyemmum yapmaq kerek,  amma bu eñ olmağan vaziyette yapılır.

– Krematsiya (yaqma) ya da İslâmda şeriat qanunlarına uyğun olmağan diger usullar kesinliknen yasaqtır, haramdır.

– Ölgen kişiniñ cesedini almaq imkân olmasa,  o ğayıp olğan insan kibi sayılır ve cenaze namazı qılınmaq kerek.

Ülema Şuranıñ reisi

E. İ. Hayrullayev

QIRIM MUSULMANLARI DİNİY İDARESİ ÜLEMA ŞURANIÑ QARARI № 9 20.04.2020 s.

Comments are closed.

İbn Ümer (Allah ondan ve babasından razı olsun) bildirgen edi (aytqan edi):
“Peyğamberimiz (Allahnıñ selâm ve rizası onıñ üzerinde olsun) dedi ki: ” İslam 5 şartta quruldı: Allahtan başqa ilah (tañrı) yoq ve Muhammed Onıñ resulü (elçisi) şeadet etmek; namaz qılmaq; zekât bermek; Allahnıñ Evine hac yapmaq, Ramazanda oraza tutmaq”.