uk

KYİVDE QURBAN BAYRAMĞA BAĞIŞLANĞAN NAMAZ ÖTKERİLGEN

Oraqnıñ 20-de Qırım Muhtar Cumhuriyeti Diniy musulman idaresi Kyiv temsilciliginiñ camisinde Qurban bayramğa bağışlanğan namaz ötkerildi. Namazda biñge yaqın musulmanlar qatıldı.

Namaz yekünlengeninden soñ bayram hutbesini Qırım MC Diniy musulman idaresiniñ Qırım Müftisi Ayder İsa oğlu Rustemov oqup, bugün musulmanlar Yüce Allahnı yükseltken künü olğanını qayd etti. O qayd etti ki: «Aslında musulmanlar er bir işni ar-Rahman ve ar-Rahim olğan adınen başlap, hususan bugün Allahqa tazim eteler. Acılar, bir yerde toplaşaraq telbiye ve tekbirlerni seslendirgen künü acılıq merasimlerini yekünlerken, Allahnıñ adını yükselteler! Allahu Akbar! Allah Yücedir! Lâhi-lâhi-il-Allah!

Tek Allah, Oña muracaat etmesine, tek Oña dua etmesine, tek Oña inanmasına, Onı sevmesine, Onıñ cezasından qorqmasına, Onıñ minnetine ümüt etmesine lâyıqtır. Bugün bayram künü – zül-hicanıñ onuncı künüdir. Cenabı Haqımız bu kün aqqında ne dey? O Resuline buyura ki: ‘Şimdi sen Rabbiñe qullıq et ve qurban çal!’ (Quran-ı Kerim 108:2). Şu merasimler bizge Cenabımız – Cenabı Tek olğanını köstere! Ümmetimiz de – yekâne Ümmettir, Yüce Rabbimiz Öz Kitabınıñ bir çoq yerinde aytqanı kibi: Aqiqaten, bu (bütün peyğamberler ve olarğa iman etkenler) tek bir ümmet olaraq siziñ ümmetiñizdir. Men de siziñ Rabbiñizim. Öyle ise, maña qullıq etiñ!’ (Quranı Kerim 21:92).

Bugünki kün – Cenabı Allahnıñ ögünde eñ güzel kündir, çünki bu – eyi niyet ve areketlerniñ eñ yüksek noqtasıdır. Felestinden Qırımğace cemaatımıznıñ ağrısı erte-keç biter. Allahnıñ yardımı keleyata. Allah bizge kâfidir ki, biz Oña işanayıq. İradesizlik köstermeñ, ğamğa qapılmañ. Eger inanğan olsañız, siz üstün çıqacaqsıñız’ (Quranı Kerim 3:139). Bu bayram künü epimiz quvanmalı ve etraftakilerimizni quvandırmalımız!»

Hutbe yekünlengeninden soñ qırımtatar halqınıñ Lideri, Ukraina millet vekili Mustafa Cemil Oğlu Ukraina ve tuvğan Qırımınıñ bütün musulmanlarını hayırladı ve Qırım işğalcilerden azat etilüv oğrundaki küreşniñ müimligini qayd etti.

QMC DMİniñ matbuat merkezi

Comments are closed.

Abu Havsa Umar ibn al-Hattab (Allah ondan razı olsun) bildirgenine köre: “Men, Allahnıñ Peyğamberi (sallaLLahu aleyhi ve sellim), aytqanını eşitken edim: “Bütün areketler yalıñız niyetlerge köre (qabul etilir) ve er bir insan tek niyetine köre alır. Buña köre de, Allah ve onıñ elçisi içün köçüv (hicret) etken kişi, Allah ve onıñ elçisi içün köçüv (hicret) etkeni sayılır, dünya malları ya da bir qadınnen evlenmek içün köçüv (hicret) etken kişi, o zaman onıñ köçüvi (hicreti) ne niyetinen yapılsa öyle qabul etilecektir”.