Allahnıñ ar-Rahman ve ar-Rahim olğan adınen!

Qırım musulmanları dini idaresi Diyanetnen beraberlikte Milli Meclis desteginen bu sene Turkiyege halqara imam hatip litseyge 8-9 sınıflarını bitirgen qırımtatar ballarnı Turkiye cumhuriyetine tasil almaq içün yollamağa planlaştıra. Bu tedbir Diyanet bursları, halqara ilâhiyat lisans burs programmı çerçevesinde kerçekleştirilicek. Bügüne qadar 2 adım atıldı:

• 56 bala Qırımdan ve Ukraina qıtadan resmi sitede qayd etildi;
• 19-20.06.2018 tarihlerde IQ testi ve mulâkat Novoalekseyevka qasabası 1 orta mektebinde Diyanet tarafından kelgen eyyeti 46 balağa keçirdi.

Yaqın zamanda sınavnıñ neticeleri ilân etilecek. Ümüt etemiz kelecek oqul senesi eñ azından 20 bala Turkiyede tasil almağa ketecek ve in şa Allah bu sayı kelecek yıllarda tek artacaq.

Ayrıca Qırım musulmanları dini idaresi Qırımtatar Kultur ve Yardımlaşma Dernegi reisine ve Bütün Dünya Qırımtatar Kongresi icra komiteti azası Mükremin Şahinge, Novoalekseyevdaki “İslâm” dini cemiyeti imamı Toqlu Üseinge, Herson bölgesi meclis reisi ve Novoalekseyevka qasabası 1 orta mektebi müdürü Lümanov Lenurğa, Milli Meclis azası ve Meclis Herson bölgesinde temsil etken Suleymanov Abmecitke ve Milli Meclis azası Bekirova Gülnarğa teşekkürni bildire.

Allah milletimizge yeni, ilim sayibi nesillerni yetiştirmege, Vatanımıznı azat etmege ve öz tuvğan topraqlarımızda milli qırımlılarnıñ mekteplerni açmağa nasip eylesin!

Mucadelemiz devam ete…

QMDİ matbuat hızmeti