​Qırımtatarlarnıñ mucadelesi devam ete. Qırım işğal akimiyetiniñ üçünci siyasiy mabusı adaletsiz cezasını çekken soñ doğmuş vatanına, Qırımğa qayttı.

1 aprel 2020- ci yılda Rusiye apishanesinde 5 yıl azatlıqtan marum etilgen soñra Ferat Sayfullayev niayet evine qayttı. Qayd etemiz ki, o qanunsız “terrorizim davası” adlı sevastopol gruppada keçe edi. Şu dava boyunca Rustam Vaitov ve Nuri Primov cezanı çekkenler ve 22 yanvar 2020-ci senede azat olğanlar. Bu davada 12 yıl apis cezası alğan Ruslan Zeytullayev de keçe.

Feratnıñ ailesini, dostlarınını ve bütün qırımtatar halqnı bu sevinçli habernen hayırlaymız ve Allah Taalâdan bütün qanunsız maküm etilgen siyasiy mabuslarnı tez azat olunmasını Allahqa dua etemiz. Bizim küreşimiz devam ete!

Bu arada Qırımda sözde “diniy vazifeli adamlar” pandemiya mevzunı spekulâtsiya etip, Qırım musulmanlarına nezareti küçlendireler. Kreml tarafından idare etilgen Qırım musulmanlarınıñ diniy idaresi qanunsız olaraq dindaşlarınıñ istegen din adamnı camide, evlerinde ve mezarlıqta diniy tedbirler keçirgen içün missionerlik işlerinde suçlanacaq ve onı davet etken insanda da qabaatlanacaq ve cezalanacaqlar.

Pandemiyanen (vebanen) küreşecek yerine işğalci akimiyet Qırımda yeñilmez qırımtatar halqınen mucadele ete ve boysunmağan, qırımtatar Milli Meclis reisine, iç bir qanunsız iş yapmağan insanlarğa qarşı yañı davalar açalar.

1783 yıldan berli Yüce Allahnıñ iradesinen zulumlarğa ve işğalcilerge qarşı küreşte qırımtatar milleti büyük zorluqlarğa, belâ ve sınavlarğa qarşı immunitet qazandı. Allahnıñ yardımınen bizler bu pandemiyanı keçirirmiz. Amma adaletsizlikniñ içinde, qanunsızlıq içinde boğulğan ve öz halqına qayğısı qalmağan devlet ayaqta qalacaqmı?

QMDİ matbuat – hızmeti