image/svg+xml Смисловий переклад Корану безкоштовно Замовити
uk

KİYEV BÖLGESİNDE “BİRLİK” – YAÑI QIRIMTATAR MEDENİYET-TASİL MERKEZİ AÇILDI

Bugün, sentâbr 19 –da, Kiyev vilâyeti, Kiyevo – Svâtoşinsk rayonı, Çayki qasabasında tantanalı sürette yañı qırımtatar medeniyet merkezi “BİRLİK” açıldı. Tantanalı tedbirge çoq sayğılı, mühterem musafirler keldi.

Merasimni “Birlik” cemiyet teşkilâtına temel qoyğan Nazim bey Seydametov açtı. Öz sözünde o “Birlik” teşkilâtnıñ ğayesi, tarihi aqqında ve medeniyet merkezniñ qurulışı aqqında añlattı. Nazim bey qayd etkenine köre yañı merkezniñ esas maqsadı maneviy ve ahlâq degerleriniñ inkişafı, saqlanması ve populârlaştırması; medeniyet arası dialog qurulması ve mükemmellendirilmesi; genç nesilniñ tasili olacaqtır.
Qırımtatar halqnıñ lideri, Ukraina halq deputatı (vekili) Mustafa ağa Cemilev ve Ukrainanıñ muvaqqat (vaqtınca) işğal topraqlarnıñ reintegratsiyası meselelerden nazir muavini Snaver Seythalilev hayırlav çıqışlar ettiler.

Qıramtatar halqnıñ Milliy Meclis reisi Refat bey Çubarov bütün musafirlerini quvançlı vaqianen hayırladı ve böyle merkezlerniñ açılışı tek qırımtatar cemiyetine degil de, bütün Ukraina vatandaşları içün pek müim olğanı qayd etti. “Qırımtatarları öz devletinde yaşasalar da, amma olar daima öz evlerine, doğmuş Qırımğa qaytmağa ıntılacaqlar” – ayttı. Refat ağa öz tarafından Meclis böyle merkezlerniñ peyda olmasına qol tutacağına işandırdı. “Çünki böyle merkezler qırımtatar medeniyetini, tilini, dinini inkişaf ve saqlanması içün yapıla. Bizler bütünley Ukrainanı, şu cümlede Qırımnı inkişaf etmege isteymiz” – dedi Çubarov.

Türkiyeniñ Ukrainadaki büyükelçisi Yağmur bey Güldere yañı medeniyet merkezniñ açılışı munasibetinen er kesni tebrik etti, türk halqı adından qardaş qırımtatar halqına destek sözlerini ayttı ve Türkiye ve Ukraina stratejik ortaqlar olğannı bildirdi.
Sıcaq hayırlav sözünen qırımtatar halqnıñ Qurultay vekili, Ukraina halq deputatı Rustem Ümerov ve Qırımda Ukraina prezidetniñ daimiy temsilcisi Anton Körineviç bulundılar.

Petropavlovsk-Borşçagovsk köy şuranıñ reisi Aleksey İvanoviç Ködebskiy er kesni merkezniñ açılışınen hayırladı ve qasabada 40-tan ziyade farqlı halq ve milletten temsilcileri olğannı ve episi añlayış ve muabet içinde yaşağanlarını qayd etti. Şu tantanalı tedbirde Petropavlosk-Borşçagovsk köy şura ve “Birlik” yañı medeniyet merkezniñ arasında işbirligi añlaşması imzalandı.

Qırım musulmanlarnıñ Diniy İdaresiniñ müftisi Ayder İsa oğlu Rustemov öz tebrik sözünde “Birlik” medeniyet-tasil merkezniñ yüregi – cami, qırımtatar medeniyetniñ yüregi ise – iman olğannı qayd ettı. Müfti bey Türk Diyanetini şu cümlede Ukrayna Din Hizmetleri Koordinatör İsa Yaykin beyni, qırımtatar halqnıñ Meclisini, Ukraina Musulmanlar Birligini (AMU) ve ayrıca her bir musulmannı, kim öz küçünen, parasınen, duasınen merkezniñ qurulışında iştirak etkenlerine teşekkür sözlerini bildirdi. “Eminim, eger bizler İsmail Gaspralı aytqanı kibi “Tilde, fikirde, işte – birlik” olsaq, birleşsek, Allahnıñ yardımınen bütün qıyınlıqlarnı yenermiz. Bu altın sözler bizim merkezniñ şiarı olsun” – dedi Müfti.

Tebrik sözleri çıqışlardan soñ “Alif-school” mektepniñ talebeleri qırımtatar ve ukrain tilinde şiirler oqudılar.

Musafirler içün merkez içinde kezinti keçirildi. İstegenler qırımtatar sanatı: Qırımnıñ tabiatınen yazılğan resimlernen ve Ukrainada nam qazanğa ustası çölmekçi Rustem Skibinnin çölmekçilik işlerinen tanış oldılar. Tedbirniñ soñunda adet üzre qırımtatar qavesi, tatlılıqlar, yemekler ikram etildi.

QMDİ matbuat – merkezi.

Comments are closed.

Abu Havsa Umar ibn al-Hattab (Allah ondan razı olsun) bildirgenine köre: “Men, Allahnıñ Peyğamberi (sallaLLahu aleyhi ve sellim), aytqanını eşitken edim: “Bütün areketler yalıñız niyetlerge köre (qabul etilir) ve er bir insan tek niyetine köre alır. Buña köre de, Allah ve onıñ elçisi içün köçüv (hicret) etken kişi, Allah ve onıñ elçisi içün köçüv (hicret) etkeni sayılır, dünya malları ya da bir qadınnen evlenmek içün köçüv (hicret) etken kişi, o zaman onıñ köçüvi (hicreti) ne niyetinen yapılsa öyle qabul etilecektir”.