Qırım musulmanları Diniy İdaresi Frenkistannıñ akimiyetine Muhammed peyğamberimizge (aleyhi-s- selâm) aqaretlengen karikaturalar basılğannı desteklegen içün öz narazılığını bildire, yañlış saya ve qatiyen takbih ete.

İslam degerlerini ve muqaddes timsallerini aqaret etilmesi kesinliknen olmaz. Bu cinayetler umuminsaniy degerliklerge ve maneviy printsiplerge zarar bere ve radikal islamofobiyanı köstere.

Peyğamberimiz Muhammed (aleyhi-s-selâm) bütün müminler içün bir örnektir. Dünyada 2 milliard insan onıñ izinden kete. Bu sebepten Peyğamberimizge (aleyhi-s-selâm) mısqıllağan karikaturalar yalıñız Frenkistan müminlerniñ degil de, bütün dünyada musulmanlarnıñ diniy duyğularını aqaretley ve aşalay.

Bu, Frenkistannıñ yolbaşçıları tarafından diniy duyğularnıñ aşalanması birinci sefer degildir. Epimiz İsa ve Musa peyğamberlerniñ (aleyhimu-s-selâm) daima aqaretlegen karikaturalar, diniy degerlikler, uçaq qazalar, facialarnı ve saire mısqıllağannı köremiz.
Frenkistannıñ akimiyeti İslâmnen alâqalı siyasetlerini ve iman etken insanlarnıñ diniy duyğularını aqaret etilgenni ğayrıdan baqmaq kerekler. Çünki Frenkistannıñ devlet birinci şahısları özlerini Avropa devletleri aileniñ bir parçası olaraq köreler, azatlıq ve insan aqlarınıñ qorunmasını ilân eteler. Lâkin diniy haq ve azatlıqqa kelgende, olar bunı ne içündir unutalar ve diger insanlarnıñ duyğularını ve yüksek maneviy degerliklerini ıncıtmaqnen ifade etilebileceklerine inanalar.

Belki Frenkistannıñ şimdiki prezidenti Makronnıñ körmek istegen “fransız islâmı” budır?

Daa da raatsızlıq bergen şey, Rusiye Federatsiyadan küçlü destek alğan fransız siyasetçilerniñ açıq ksenofobik beyanatları. Hususan bütün camilerni qapatmasınıñ zaruretinen, Frenkistanda İslâmnı yasaqlanması ve bütün musulmanlarını ülkeden çıqarmasını ilân etken Marin Le Pen.

Avropa devletlerniñ liderlerine özleri ilân etken emiyetli bir qaideni hatırlatmaq isteymiz: “Bir insannıñ aqları, diger insannıñ aqları başlağan yerde bite”.

Qırım muftisi
Ayder İsa oğlu Rustemov