Armannıñ 18-de rus işğalcileriniñ ‘mahkemesi’ dört Aluştalı qırımtatarğa nevbetteki ükmüni çıqarıp, Ruslan Mesutov ve Ruslan Halilovnı – 18-er, Eldar Kantimirovnı – 12 ve Ruslan Nagayevni – 13 yılğa azatlıqtan marum etti de, endi kelecek künü saba Qırımda yañı tintüvler keçirgen… Tünevin Rostov-na-Donudaki mahkemecilerniñ ‘ziyafeti’nden qaytqan Rustem Murasov ve, Qırım siyasiy mabüslerine ve qorantalarına qoltutqan, faal vatandaşlıq mevamları olğan musulmanlar Rustem Tairov, Cebbar Bekirov, Zavur Abdullayev ve Raif Fevziyev, evlerinde silâcılarnıñ tecavuzından soñ, apiske alındılar. Qırımda silâcılarnıñ areketi aqibetinde babasız qalğan balalarınıñ sayısı 200-ge keldi…

Rusiye, halqara uquqı qaidelerine qaçıncı kere emiyet bermey, em bu, hususan işğalcilerni pek qozğatqan Qırım platformı arfesinde taacipli bir şeyge oşamay. Lâkin bu apis etüv ve üküm çıqaruvlar – ileride rus akimiyetini yapqan episi cinayetleri içün mahküm etecek halqara mahkemelerge daa bir isbattır. Em, şübesiz, Cenab-ı Haqnıñ mahkemesi bar, ondan kimse qurtulmaz!
Küreşimiz ep devam etmekte!

QMC DMİniñ matbuat hızmeti