RUSİYE – UKRAİN SAVAŞNIÑ QIRIM QARAMANLARI
Fevral 27-de 2020 s. Qırım Resurs merkezi ve qırımtatar halqnıñ Meclisi tarafından teşkil olunğan ” Rusiye – ukrain savaşnıñ qırım qaramanları” tedbiri olıp keçti. Qırımnıñ işğali altıncı senege bağışlanğan tedbirde Donbasstaki cenk vaqiaların qaramanlarınen körüşüv oldı. Olarnıñ arasında bayağı qırımtatarları da bar. Yazıq ki dört insan elâk olğan.
Tedbir Ukrain krizis media – merkezinde saat 12:30 başlandı. Keçken press –brifingde ayrı Qırım batalyonı teşkil etmekni tevsiye ettiler. Brifing iştirakçileri Qırımdan cenkte olğan insanlar vatanlarına qaytıp olamağanlarını ve aynı zamanda Ukrainada da içtimaiy aqları olmağannı, qorçalanmağannı qayd ettiler. Bu insanlarnıñ Qırımda yaşağan doğmuşlarnıñ evlerinde tıntuvler keçirile, özlerine ise cebeden qaytmağa yerleri yoq.
Brifingten soñ tedbir iştirakçileri Qırım musulmanlarnıñ Diniy idaresi merkezine bardılar. Qırım müftisi “Yasin” sureni oqudı ve Allahnıñ yolunda küreşkenler içün dua ettiler, cemaat namaznı qıldılar.
Tedbirde qırımtatar halqnıñ lideri Mustafa Cemilev de qatıldı. Sıcaq müitte suhbet ettiler. İstegenler Mustafa ağağa raatsız etken suallerini soradılar. Qırımtatar milletniñ lideri elinden kelgeni qadar meselelerni çezmege tırışacağına söz berdi.
Resmiy bölüminiñ soñunda lezetli üyle yemegini ikram ettiler.
QMDİ matbuat – hızmeti