Quralay (mays)nıñ 13-de QMC MDİ Kyiv temcilciligindeki camisinde, büyük islâm Oraza Bayramına bağışlanğan nevbetteki bayram namazı keçti.

Rusiyeniñ işğali sebebinden endi yedinci yıl devamında qırımtatarlar özüniñ ana-Vatnını terk etmege mecbur olıp, bayram namazlarını sürgünde qılalar.

Dua ve hutbeni Qırım Muhtar Cumhuriyetiniñ Diniy Musulmanları Müftisi Ayder Rustemov oqup, elhamdülillâ sözünden soñ Muqaddes Qurannıñ bir ayetini misal etip ketirgen: «Bütün bular sayını tamamlavuñız ve sizge doğru yolnı kösterüvine qarşılıq Allahqa tazim etüviñiz, şükür etüviñiz içündir» (Quran-i Kerim, süre 2, ayet 185).

Qırım Müftisi bu büyük bayramnen bütün musulman ümmetini hayırlap, dindarlarğa onıñ emiyetini hatırlatqan, em de şunı qayd etken ki, oraza tutqan ayı yekünlengeninen, onıñ gece namazları, duaları ve eyi işler-areketlerinen beraber, yılnıñ diger aylarında şu azim ibadetler toqtatıla, dep tüşünmek doğru degildir. Musulmanlar Allağa daima ibadet eterler.

Müfti daa şunı da qayd etti ki, bayram müiti duyulğanına baqmadan, bizim islâm ümmetimizniñ, bizim bütün dünyada – Qırımdan Felestinge qadar – ah çekken ağa ve tata-qardaşlarımız içün yürek yanıqları toqtamay.

Hutbeden soñ caminiñ azbarında ananeviy sıylav, küçük musulmanlarnı da bedava bayram bahşışları bekley edi!

Bayram, kütleviy tedbirlerni qalentirde keçirüv tevsiyelerniñ episine riayet eterek keçirildi.