Ramazan ayına baqmadan, işğalciler Qırımda musulmanlarnı qorquzmağa ve tintüvler kibi pis tecribeler keçirmege toqtamaylar. Tünevin ve bugün, er vaqıt olğanı kibi, saar maalinde, küçük balalarnı ve qart ana-babalarını qorquzaraq, rus silâlıları qırımtatarlarnıñ (Qarasuvbazar bölgesiniñ köyünden Eldar Fetlâyevniñ ve Aqmescit bölgesiniñ Hoşkeldi qasabasından Ruslan Ramazanovnıñ) evlerine urdurıp kirdiler.

Odalarını aqtaruv, şahsiy eşyalar, telefon, kompyuter, kitaplarnı tartıp aluv, terrorizm ve ekstremizmde qabaatlav – bular episi, Qırımnıñ tamır halqını qorqutıp yıqtırmağa tırışqan, Putinniñ cinaiy işlerindeki ortaqlarınıñ usullarıdır.

Biz, qırımtatar halqına, Qırım musulmanlarına yapılğan öyle arekelerge özümizniñ qararlı narazılığımıznı bildiremiz ve Allah-u Taalâ episi musulmanlarnı qorçalağanını ve bütün zalımlarnıñ sırtına urğanını isteymiz!

Amin!

Küreşimiz devam etmekte!

QMC DMİniñ matbuat hızmeti